धुळे अजिंक्य योद्धा न्यूज नेटवर्क
भारतीय जनता पार्टीचे नेते वेगवेगळ्या राज्यात निवडून आलेले सरकार पाडण्याचे काम करतात .त्यांच्याकडे ईडी, सीबीआय आणि आयकर विभागाच्या चौकशीची चावी आहेत .देशाचे पंतप्रधान नरेंद्र मोदी आणि अमित शहा यांच्याकडे या चाव्या आहेत. नेत्यांच्या मागे चौकशा लावून ते सरकार पाडतात. पण आपल्या पक्षातून पळून गेलेले नेते देशाचे भले करणार नाही. त्यांना ऑयडियालाजी आणि विचार नसतांना ते देश आणि राज्याचे काय भले करणार, असा प्रश्न काँग्रेसचे अध्यक्ष मल्लिकार्जुन खरगे यांनी आज केले.
धुळे लोकसभेतील शिंदखेडा येथे आज महाविकास आघाडीची सभा पार पडली. या सभेत काँग्रेसचे प्रदेशाध्यक्ष नाना पटोले, सचिव रमेश चेन्नीथला, कार्याध्यक्ष तथा आमदार कुणाल पाटील, उमेदवार डॉ शोभा बच्छाव, माजी आमदार अनिल गोटे, राज्यसभेचे खासदार चंद्रकांत हंडोरे ,माजी आमदार रामकृष्ण पाटील, शिवसेनेचे जिल्हाप्रमुख अतुल सोनवणे, महेश मिस्त्री, हेमंत साळुंखे, राष्ट्रवादीचे संदीप बेडसे, काँग्रेसचे प्रदेश सरचिटणीस युवराज करणकाळ, आदिवासी आघाडीच्या प्रतिभाताई शिंदे, आदिवासी संघटनेचे शिवाजीराव ढवळे, माजी मंत्री अनिस अहमद, माजी खासदार बापू चौरे ,जिल्हाध्यक्ष श्यामकांत सनेर आदींची उपस्थिती होती. यावेळी बोलताना खरगे यांनी भारतीय जनता पार्टी आणि पंतप्रधान नरेंद्र मोदी यांच्यावर टीकास्त्र सोडले. ही निवडणूक महत्त्वाची आहे. देशाचे भवितव्य ठरवणाऱ्या या निवडणुकीत प्रत्येकाने मतदान केले पाहिजे. या देशातील संविधान आणि लोकशाही टिकवण्यासाठी प्रत्येकाने जागरूक राहिले पाहिजे. या देशात संविधान नसेल तर कुणीही सुरक्षित राहू शकत नाही .जनतेकडे मतदानाचा अधिकार आहे. या मतदानातून सत्ता मिळते म्हणूनच नेते तुमच्या दाराशी येतात. मतदानाच्या या महत्त्वाच्या माध्यमातून आपण लोकशाही टिकवण्यासाठी पुढे आले पाहिजे .महाराष्ट्र ही समाजसुधारकांची भूमी आहे. या समाजसुधारकांनी देशासह जगाला मार्गदर्शक ठरेल, असे कार्य केलेले आहेत. त्यांचे कार्य टिकवण्याची जबाबदारी आज प्रत्येकाची आहे .या समाज सुधारकांनी गुलामगिरी नष्ट करण्यासाठी बलिदान केले. पुढील काळात गुलामगिरीत जायचे नसेल तर परिवर्तना बरोबर जनतेला राहावे लागेल. भारतीय जनता पार्टीला मतदान केल्यास लोकशाही धोक्यात येऊन पुढील पिढी गुलामगिरीत जाण्याची शक्यता नाकारता येत नाही, असा टोला देखील त्यांनी लावला.
पंतप्रधान नरेंद्र मोदी हे त्यांच्या पक्षाला 400 पार जागा मिळतील ,असे सांगतात. मात्र ते एकट्याच्या बळावर असे सांगू शकत नाही. कारण कोणताही लोकप्रतिनिधी आणि पक्षाला यश देण्याचे अधिकार या देशातील मतदारांना आहे. जनता ठरवतील तोच पक्ष विजयी होऊ शकतो. 400 पार जागा म्हणजे ही काही मोदीची गॅरंटी नव्हे ,असा टोला देखील त्यांनी लावला. या देशाच्या विकासात शेतकऱ्यांचा फार मोठा हातभार आहे. मात्र पंतप्रधान नरेंद्र मोदी हे शेतीच्या मशागतीसाठी लागणाऱ्या फर्टीलायझरवर कर लावतात. तर शेती करण्यासाठी लागणाऱ्या यंत्रसामग्रीचे दर वाढवतात. दुसऱ्या बाजूला शेतीमालाला भाव देत नाही. त्यामुळे शेतकरी अडचणीत येतो आहे. जगाचा पोशिंदा असणारा शेतकरी अडचणीत आणण्याचे काम मोदी यांनी केल्याचा आरोप त्यांनी यावेळी केला .
भारतीय जनता पार्टी कडून काँग्रेसने 70 वर्षात काय केले असा आरोप केला जातो. पण आम्ही काहीच केले नसते तर तुम्हाला पंतप्रधान होताच आले नसते .आम्ही देश सुरक्षित ठेवला. पाकिस्तान तोडून बांगलादेशची निर्मिती केली. पण तुम्ही पहाड खोदून त्यातून उंदीर काढतात. आणि त्याचा प्रचार करतात, असा टोला देखील त्यांनी लावला. भारतात भारतीय जनता पार्टी दडपशाही करते. आता पावेतो सुमारे 800 नेत्यांच्या मागे वेगवेगळ्या यंत्रणेच्या माध्यमातून चौकशी करून त्यांना जेलमध्ये टाकले जाते .शरण येणाऱ्यांना मात्र पायघड्या टाकल्या जातात. पण महाराष्ट्र हा शूरांचे राज्य आहे. त्यामुळे आपला स्वाभिमान गहाण टाकून भाजपा समोर शरणागती पत्करणे योग्य नाही, असे देखील त्यांनी सांगितले.
